ຂປລ. ໃນວາລະດຳເນີນກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ໃນວັນທີ 25 ມີນາ 2021 ໂດຍການເປັນ ຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ຂຶ້ນປະກອບຄຳຄິດຄຳເຫັນ ໃສ່ບົດລາຍງານຂອງອົງການກວດກາແຫ່ງລັດ ທີ່ສະເໜີໂດຍ ທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ ໂດຍໄດ້ສະແດງຄວາມຊົມເຊີຍຕໍ່ຜົນງານ ແລະ ຜົນສຳເລັດ ທີ່ ອົງການກວດກາລັດຖະບານ ໃນເມື່ອກ່ອນ ກໍຄື ອົງການກວດກາແຫ່ງລັດ ໃນປັດຈຸບັນຍາດມາໄດ້ໃນໄລຍະ 5 ປີຜ່ານມາ, ພ້ອມສະເໜີໃຫ້ມີການປັບປຸງຫລາຍບັນຫາທີ່ເປັນຂໍ້ຄົງຄ້າງ.

ຄະນະປະຈຳ ສະພາແຫ່ງຊາດ ເຫັນວ່າ ຍັງມີບາງບັນຫາທີ່ອົງການກວດກາແຫ່ງລັດ ຈະຕ້ອງໄດ້ສືບຕໍ່ປັບປຸງແກ້ໄຂ ເປັນຕົ້ນ: ການຜັນຂະຫຍາຍແຜນຍຸດທະສາດ ສະກັດກັ້ນ ແລະ ຕ້ານການສໍ້ລາດບັງຫລວງຍັງຊັກຊ້າ, ການສຶກສາອົບຮົມ ຜົນຮ້າຍຂອງການສໍ້ລາດບັງຫລວງ ຕໍ່ເປົ້າໝາຍຕ່າງໆໃນທົ່ວສັງຄົມຍັງບໍ່ເລິກເຊິ່ງ, ບັນດາປະກົດການສວຍໃຊ້ໜ້າທີ່ຕໍາແໜ່ງສໍ້ລາດບັງຫລວງ ດ້ວຍຫລາຍຮູບການ ແລະ ຫລາຍລະດັບແຕກຕ່າງກັນຍັງແຜ່ຫລາຍ, ສັງຄົມທັກທ້ວງຕິຕຽນຫລາຍ ແຕ່ການກວດກາ ແລະ ສະກັດກັ້ນ ຍັງເຮັດໄດ້ໜ້ອຍ, ມີຫລາຍກໍລະນີກວດເຫັນແຕ່ບໍ່ໄດ້ຮັບການແກ້ໄຂຈິງຈັງ; ການກວດກາຕາມຜົນການກວດສອບ ໂດຍສະເພາະແມ່ນການກວດກາຂົງເຂດການລົງທືນ

ການຄຸ້ມຄອງງົບປະມານ, ການເກັບລາຍຮັບ, ການຄຸ້ມຄອງນໍາໃຊ້ຊັບພະຍາກອນທໍາມະຊາດ ຍັງເຮັດໄດ້ໜ້ອຍ, ມີບາງເປົ້າໝາຍກວດພົບເຫັນຄວາມເສຍຫາຍຫລາຍ ແຕ່ການເກັບກູ້ເງິນຄືນໃຫ້ລັດ ໄດ້ໜ້ອຍ; ການພິຈາລະນາຄຳຮ້ອງ-ຄຳສະເໜີ ຍັງຂາດການປະສານສົມທົບກັບພາກສ່ວນທີ່ກ່ຽວຂ້ອງ ບາງກໍລະນີການແກ້ໄຂ ຍັງບໍ່ເອກະພາບກັນ,

ຫລົບໄປ-ຫລົບມາ ແກ່ຍາວຊັກຊ້າ, ສ້າງຄວາມສັບສົນໃຫ້ແກ່ຜູ້ຮ້ອງທຸກ; ຄວາມຮັບຮູ້ເຂົ້າໃຈຕໍ່ວຽກງານກວດກາລັດ ກັບ ວຽກງານກວດກກາພັກ ຍັງປົນເປກັນຢູ່ ພະນັກງານ, ສະມາຊິກພັກ ທີ່ຮັບຜິດຊອບວຽກງານກວດກາ ກໍບໍ່ທັນເຫັນໄດ້ຄວາມສໍາຄັນ ຂອງວຽກງານກວດກາ ບາງຄັ້ງເກີດມີປະກົດການຫຍໍ້ທໍ້ ໃນການປະຕິບັດໜ້າທີ່.

ຂ່າວ: ທະນູທອງ ພາບ: ຂັນໄຊ

LEAVE A REPLY

Please enter your comment!
Please enter your name here